Ինչ ենք մենք հսկում
ՀՀ ԿԲ-ի վճարահաշվարկային համակարգի հսկողության առարկա են հանդիսանում համակարգային և հանրային նշանակություն ունեցող համակարգերը՝ կախված երկրի ֆինանսական համակարգի կայունության վրա դրանց ունեցած ազդեցության չափից։
ՀՀ Կենտրոնական բանկի խորհրդի կողմից 2005թ.-ին ընդունված «Հայաստանյան վճարահաշվարկային համակարգերի ստեղծման և գործունեության իրականացման համար թույլտվության տրամադրման» Կանոնակարգ 18-ը սահմանում է հայաստանյան վճարահաշվարկային համակարգերի՝ հանրային կամ համակարգային դասելու չափանիշները:
Համաձայն Կանոնակարգ 18-ի և «Հայաստանի Հանրապետության կենտրոնական բանկի կողմից վճարահաշվարկային համակարգերի հսկողության իրականացման հայեցակարգի» Հայաստանի Հանրապետությունում գործող համակարգային նշանակություն ունեցող վճարահաշվարկային և արժեթղթերի հաշվարկային համակարգերն են.
- Հայաստանի Հանրապետության կենտրոնական բանկի Էլեկտրոնային վճարումների համակարգը,
- Հայաստանի Հանրապետության կենտրոնական բանկի «Պետական արժեթղթերի հաշվառման և հաշվարկների իրականացման համակարգը»,
- Հայաստանի կենտրոնական դեպոզիտարիայի «Արժեթղթերի հաշվառման և հաշվարկային միասնական համակարգը»:
Ի լրումն, համաձայն նույն փաստաթղթերի՝ Հայաստանի Հանրապետությունում գործող հանրային նշանակություն ունեցող են «ԱՐՔԱ» քարտային միասնական համակարգը և «ՅՈՒԲԻՓԵՅ» դրամական փոխանցումների հայաստանյան վճարահաշվարկային համակարգը:
Հսկողության օբյեկտ են հանդիսանում նաև ՀՀ-ում գործող արտասահմանյան վճարահաշվարկային համակարգերը, որոնց հսկողության առանձնահատկությունները սահմանված են «Հայաստանի Հանրապետության կենտրոնական բանկի կողմից վճարահաշվարկային համակարգերի հսկողության իրականացման հայեցակարգով»:
Անկանխիկ վճարումների նկատմամբ հանրության վստահության ամրապնդման նպատակն ապահովելու համար ՀՀ կենտրոնական բանկի կողմից կարևորվում է նաև վճարային գործիքների/ սխեմաների հսկողությունը, որը սակայն սահմանափակված է միայն մոնիթորինգով՝ առաջնահերթություն տալով համակարգերին: